Plantun de Prouvènço

Pèr coumpara dos planto d'encò nostre

Passiflora caerulea & Oenothera glazioviana

Flour-de-la-passioun

Passiflora caerulea

Passifloraceae

Autre noum : Granadiho.

Noms en français : Fleur de la Passion, Passiflore.

Descripcioun :
Planto escalanto emé de vediho que trachis pulèu rapidamen. Li fueio soun penado (5 partido). S'aremarco subretout emé si gràndi e poulìdi flour bluio que podon pas engana. Fai pièi de fru coulour d'arange. Dins la naturo èi raro (R), mai èi coumuno dins li jardin.

Usanço :
Aquelo planto nous vèn dis Americo e lou noum ramento la semblanço de sa flour emé la courouno dóu Crist. Lou fru èi manjadis e la planto couneigudo pèr èstre vertuouso. Se prèn subretout en tisano pèr apasima contro lis ànci e ajuda à dourmi. Lis american se servien di fueio pèr sougna li macaduro e bruladuro (en emplastro).

Port : Liano
Taio : Pancaro entresigna
Fueio : alterno
Tipe bioulougico :
Cicle bioulougico : Planto renadivo

Gènre : Passiflora
Famiho : Passifloraceae

Coulour de la flour : Bluio
Petalo : >6
Ø (o loungour) flour : Pancaro entresigna
Flourido : Printèms - Estiéu - Autouno

Sòu : Ca
Autour basso e auto : Pancaro entresigna
Aparado : Noun

Liò : Ribiero
Estànci : Termoumediterran à Mesoumediterran
Couroulougi : Pancaro entresigna
Ref. sc. : Passiflora caerulea L., 1753

Rougeto(di-gràndi-flour)

Oenothera glazioviana

Onagraceae

Autre noum : Erbo-dis-ase.

Nom en français : Onagre à grandes fleurs.

Descripcioun :
La rougeto-di-gràndi-flour trachis majamen dins lou limas en ribo d'aigo ounte flouris au printèms, es à dire mai d'ouro que si cousino (coume Oenothera biennis que flouris en estiéu). Se recounèis eisadamen à si petalo mai grando (45 mm), à si boutoun mai prim, sa coulour mai roujo e subretout à soun estigmate en crous, pu long que lis estamino (fotò).

Usanço :
Soun óurigino s'atrouvarié dins un mestissage (ibridacioun) dins un jardin en Éuropo e se sarié espandido dins lou mounde. A li mémi prouprieta que la rougeto, Oenothera biennis.